Çağırayım mevlam səni

Çağırayım mevlam səni Müəllif: Yunus İmrə

Mənbə: Seçmə aşıq şeirləri. 3 cilddə. I cild (az). DGTYB (2011). Orijinal mənbədən 2016-04-01 tarixində arxivləşdirilib. Yoxlanılıb 2016-08-11.

Dağlar ilə, daşlar ilə
Çağırayım, Mevlam, səni.
Səhərlərdə quşlar ilə,
Çağırayım, Mevlam, səni.

Su dibində mahi ilə,
Səhralarda ahu ilə,
Abdal olup “yahu” ilə,
Çağırayım, Mevlam, səni.

Göy üzündə İsa ilə,
Tur dağında Musa ilə,
Əlimdəki əsa ilə,
Çağırayım, Mevlam, səni.

Dərdi öküş Əyyub ilə,
Gözü yaşlı Yəqub ilə,
Ol Mühəmməd məhbub ilə,
Çağırayım, Mevlam, səni.

Bilmişim dünya halını,
Tərk etdim qilü qalını;
Baş açıq, ayaq yalını,
Çağırayım, Mevlam, səni.
 
Yunus oxur dillər ilə,
Ol qumru bülbüllər ilə,
Haqqı sevən qullar ilə,
Çağırayım, Mevlam, səni.