Deyərsiz

Vikimənbə saytından
Jump to navigation Jump to search
Deyərsiz
Müəllif: Növrəs İman
Mənbə: Qara Namazov, "El çələngi" (xalq şeirindən seçmələr), Bakı, 2004.

Hələ qəflətdəsiz, yatmısız belə,
Sayıb məni bir divana deyərsiz.
Cəfanız çox olar, yəqin, il-ilə,
Dərdinizi ruhi-cana deyərsiz.

Sərsəri fanidə qırılar canlar,
Tökülər yaxından çox nahaq qanlar,
Seçilməz haqq-nahaq yolu qananlar,
Məəttəlik bu divana,–deyərsiz.

Ucalar dillərdə ah ilə fəryad,
Bir tərəfdən olmaz eyləyən imdad,
İstəkli dost dostun etməyəcək yad,
Kəc dolanıb bu zamana,–deyərsiz.

Yanmaz, geçə çox çıraqlar qaralar,
Gərdiş eli bir-birindən aralar,
Pozular bağçalar, güllər saralar,
Səfər edib biyabana deyərsiz.

Ömrə vəfa yoxdu, çoxdu cəfası,
Bərhəm olsun bu dövranın əsası.
Novrəs İmandakı dərdin binası
Qurulubdu doğruyana,–deyərsiz.