Ha bular, bular (Aşıq Ələsgər)

Vikimənbə saytından
Ha bular, bular (Aşıq Ələsgər)
Müəllif: Aşıq Ələsgər
Mənbə: Aşıq Ələsgər (2004). Əsərləri (az). "Şərq-Qərb". ISBN 9952-418-21-0. 2017-06-19 tarixində arxivləşdirilib. 2017-06-19 tarixində istifadə olunub.

Səba dost zülfünə şanə çəkəndə,
Yayılar gərdənə ha bular, bular.
Hər kim ki, sidq ilə dilək diləsə,
Əlbəttə, mətləbin ha bular, bular.

Sərrafın dəstində nə dana – dеdim,
Könül, can quşuna nə dana – dеdim.
Dərdimi dərdbilməz, nadana dеdim,
Anlamaz, başını ha bular, bular.

Ələsgərəm, məskənimdi o diyar,
Al xəncəri, bağrım başın, odu, yar!
Еvdən çıxdı yalın qılınc, odu yar,
Bilirəm, qanıma ha bular, bular.