Kamil mürşidə varmasan olmaz

Kamil mürşidə varmasan olmaz Müəllif: Yunus İmrə

Mənbə: "Seçmə aşıq şeirləri. 3 cilddə. I cild" (PDF) (az.). DGTYB. 2011. 2016-04-01 tarixində arxivləşdirilib (PDF). İstifadə tarixi: 2016-08-11.

Gəl ey qardaş Haqqı bulayım dersən,
Bir kamil mürşidə varmasan olmaz,
Rəsulun cəmalın görəyim dersən,
Bir kamil mürşidə varmasan olmaz.

Necələr gittilər mürşid arayı,
Arayanlar buldu dərdə dəvayı,
Min kəz oxusan da ağdan qarayı,
Bir kamil mürşidə varmasan olmaz.

Gəl şimdi, qardaşlar, gidəlim belə,
Necə aşıqların bağrını dələ,
Cəbrail dəlildir, Əhmədə belə,
Bir kamil mürşidə varmasan olmaz.

Kadılar mollalar cümlə gəldilər,
Kitabların həp bir yerə qoydular.
Sən bu elmi kimdən aldın dedilər
Bir kamil mürşidə varmasan olmaz.

YUNUS İMRƏ bunda məna var dedi,
Bir kamil mürşidə sən də var şimdi,
Həzrəti Musaya, Xızra var dedi,
Bir kamil mürşidə varmasan olmaz.