Bu səhifə korrektə edilib
Yaxşıya bəd demə, düz demə nəsə,
Çalış toxunmasın sözün heç kəsə.
Kökü yerdə olub günəş görməsə,
Hər bitən ağacda bar olmaz-olmaz.
Şirə döşürsən də sən ətək-ətək,
Arı bal toplamaz olmasa pətək.
Uca ağaclarda bar olmayantək,
Namussuz sifətdə ar olmaz-olmaz.
Elin şadlığında deyib-gülməsə,
Gəzib dağlarını düzə gəlməsə.
Sənətin qədrini duya bilməsə,
Könül aşinası tar olmaz-olmaz.
Sənətkar, sözün yaz, durma fəth eylə,
Gəzib yaylaqları sən gülə-gülə.
Fəqət bağlanmasan obaya, elə,
Bil, sözün dillərdə car olmaz-olmaz.
YETƏR
Bahar fəsli yaz ayları gələndə,
Açılarmı sənin kimi gül, Yetər?!
Ay qabağın, qələm qaşın, gül üzün,
Nə şirindi dəhanında dil, Yetər!
44