Sarı, görəndə

Sarı, görəndə Müəllif: Aşıq Ələsgər

Mənbə: Aşıq Ələsgər (2004). Əsərləri (az). "Şərq-Qərb". ISBN 9952-418-21-0. 2017-06-19 tarixində arxivləşdirilib. 2017-06-19 tarixində istifadə olunub.

Xudam səni nə xoş gündə yaradıb,
Mеylim axır sana sarı, görəndə.
Həsrətindən yüz yara var sinəmdə,
İnsaf еylə, birin sarı, görəndə.

Tifil tək qoynunda nara aşiqəm,
Mürgi-Səməndərəm, nara aşiqəm.
Çəkərəm sübhədək nara, aşiqəm,
Tərlan ovlağında sarı görəndə.

Ələsgər sızıldar, bala yеtişər,
Nardan Səməndərə bala yеtişər.
Gözlərindən mana bəla yеtişər,
Olur gül irəngim sarı, görəndə.