Vəslin bana həyat verir, firqətin məmat

Vəslin bana həyat verir, firqətin məmat,

Subhanə xaliqi xələqəl-movtə vəl-həyat.^[1].

Hicranına təhəmmül edən vəslini bulur,

Tuba limən yusaiduhus-səbru vəs-səbat.^[2].

Mehrindir iqtinai-məqasid vəsiləsi,

Ma şaə mən əradə, bihil-fovzu vən-nəcat.^[3].

Tökmüş riyazi-təb’imə barani-şövqini,

Mən ənzələl-miyahə və əhya bihin-nəbat.^[4].

Həq afərinişə səbəb etdi vücudini,

Əvcəbtə biz-zuhuri zuhurəl-mukəvvənat.^[5].

İyzəd səriri-hüsnə səni qıldı padişah,

Vəh əla kəmalə zatikə fi əhsənis-sifat.^[6].

Qıldın ədayi-nə’t, Füzuli, təmam qıl,

Kəmmilhu bis-səlami və təmmimhu bis-səlat.^[7].

1. Tərcüməsi: Pak və müqəddəsdir o yaradan ki, diriliyi və ölümü yaratmışdır.
2. Tərcüməsi: O adam xoşbəxtdir ki, mətanət və səbr ona kömək edir.
3. Tərcüməsi: Nə istərsə, kimi nəzərdə tutarsa, nəcat və müvəffəqiyyət onun vasitəsilədir.
4. Tərcüməsi: Yağışı yağdırıb, bitkiləri dirildən.
5. Tərcüməsi: Zühurunla varlığın zühuruna səbəb oldun.
6. Tərcüməsi: Zatının kəmalını gözəl sifətlərlə yüksəltdi.
7. Tərcüməsi: Salam ilə onu tamamla, dua ilə bitir.