Ölüm, ardıma düşüb də yorulma

Ölüm, ardıma düşüb də yorulma Müəllif: Qaracaoğlan

Mənbə: Anar (1999). Min beş yüz ilin oğuz şeri. Antologiya, I kitab. (az). Bakı: "Azərbaycan". 2017-07-08 tarixində arxivləşdirilib. 2017-07-08 tarixində istifadə olunub.

Ölüm, ardıma düşüb də yorulma
Var get ölüm, bir zaman da yenə gəl!
Aqibət alarsan, qoymazsan məni
Var get ölüm, bir zaman da yenə gəl!

Böylə bir vaxıtlar yeyib içərkən,
Yeyib içib, yaylalarda gəzərkən.
Yenəmi gəldin mən səndən qaçarkən?
Var get ölüm, bir zaman da yenə gəl!

Çıxıb boz qurdlarla ulaşamadım,
Yalan dünya sənə çıxışamadım,
Eşimlə, dostumla buluşamadım,
Var get ölüm, bir zaman da yenə gəl!

Qaracaoğlan der ki, dərdim pək betər
Baxçada bülbüllər şaqıyıb ötər.
Anamı, atamı dün aldın, yetər
Var get ölüm, bir zaman da yenə gəl!