Ağrı dağı (rəvayət)
|
Eyni adda digər əsərlər üçün dəqiqləşdirmə səhifəsinə baxın. |
| Ağrı dağı Müəllif: Şifahi xalq ədəbiyyatı |
Keçmişlərdə Ağrı dağı ilə Haça dağ yaxın qonşu olublar. Çox
da istəkli imişlər. Həmişə bir-birini gözlər, mehriban dolanıb ömür
sürərlərmiş. Bir gün bu dağların arasında bərk mübahisə düşür. İş o
yerə çatır ki, onlar hirslənib düşmən kimi dalaşmağa başlayırlar.
Haça dağ özünü haqlı bilib qəzəbindən bir dəli nərə çəkir. Əl atıb
Ağrıya güclü zərbə vurur. O zaman Ağrı hamilə imiş. Zərbənin
gücündən bala salır.
Ağrı qonşusunun bu hərəkətinə tab gətirə bilmir. Özünü toplayıb o da Haça dağa öz zərbini göstərir. Haça dağın fəryadı yeriyurdu götürür. Ağrının zərbindən onun da başı aralanır. Deyirlər ki, o vaxt başı ayrıldığından adı da Haça dağ qalmışdır. Ağrının saldığı bala isə böyüyüb onun yanında göylərə baş çəkmişdir. Adına Bala Ağrı demişlər.