Ay Sənəm, Sənəm

Vikimənbə saytından
Jump to navigation Jump to search
Ay Sənəm, Sənəm
Müəllif: Şair Məhəmməd
Mənbə: Sazlı-sözlü Göyçə (II kitab) (az). Elm və təhsil (2018). Orijinal mənbədən 2018-06-01 tarixində arxivləşdirilib. Yoxlanılıb 2018-06-01.

Sübhü şəm dərdindən yahu çəkərəm,
Ölüncə deyərəm: ay Sənəm, Sənəm.
Gözlərimdən qanlı yaşlar tökərəm,
Kirpiyi ox, qaşı yay Sənəm, sənəm!

Bağban olsam, gəl bağçaya, bar apar,
Gəzək, seyr eyləyək bağı bərabar.
Yoxdu yer üzündə sana barabar,
Ərşdə mələklərə tay Sənəm, sənəm!

Buxağın büllurdu, yanağın lala,
Vəsfin təzəlikcə düşüb mahala.
Məhəmmədi döndəribsən abdala,
Eyləyibsən ömrün zay, Sənəm, sənəm!