Bir ayrılıq, bir yoxsulluq, bir ölüm

Bir ayrılıq, bir yoxsulluq, bir ölüm Müəllif: Qaracaoğlan

Mənbə: Azərbaycan Aşıqlar Birliyi. "Ustad nəfəsli saz-söz ərməğanı" (PDF) (az.). “Zərdabi Nəşr” MMC nəşriyyatı. 2020. 17 iyun 2023 tarixində arxivləşdirilib (PDF). İstifadə tarixi: 17 iyun 2023.

Vara-vara vardım o qara daşa,
Həsrət qoydun məni qohum-qardaşa.
Səbəb nə tökülən bu qanlı yaşa? –
Bir ayrılıq, bir yoxsulluq, bir ölüm.

Neçə sultanları taxtdan endirdi,
Neçəsinin gül bənizin döndərdi,
Neçəsini gəlməz yola göndərdi,
Bir ayrılıq, bir yoxsulluq, bir ölüm.

Qaracaoğlan der: Qondum, köçülməz,
Əcəlin şərbəti – acı içilməz.
Üç dərdim var bir-birindən seçilməz,
Bir ayrılıq, bir yoxsulluq, bir ölüm.