Bir gün (Aşıq İdris)

Eyni adda digər əsərlər üçün dəqiqləşdirmə səhifəsinə baxın.

Bir gün Müəllif: Aşıq İdris

Kasıbın başına ələmə odu,
Fələyin badına gələrsən bir gün.
Vallah, belə qalmaz dönər zamana,
Etdiyin-tutduğun bilərsən bir gün.

O yoğun boynuna zəncir salınar,
Yazığın-yuzuğun öcü alınar.
Kəndlərdə adına zurna çalınar,
Xəlvətdə göz yaşın silərsən bir gün.

İdrisin sözləri boşuna deyil,
“Böyüklük” kimsəyə qalmaz yaxşı bil.
Qəza gəlsə səni edər zir-zibil,
Düşər vəzifədən ölərsən bir gün.