Boylana-boylana (Aşıq Əsəd)

Boylana-boylana Müəllif: Aşıq Əsəd

Mənbə: "Qərbi Azərbaycan aşıqları" (poeziya antologiyası). Azərbaycan Aşıqlar Birliyi. Bakı, "Zərdabi nəşr" MMC, 2023. səh.378; ISBN 978-9952-571-42-4

Cilvələnib kəklik kimi，
Ötür boylana-boylana.
Müjganların sinəm üstə，
Atır boylana-boylana.

Eşqinən çalıram sazı，
Sənsən aşığın murazı，
Bu beymürvət qəmzə-nazı，
Satır boylana-boylana.

Navat deyərlər adına，
Aşiqin salmaz yadına，
Şirin canım eşq oduna，
Qatar boylana-boylana.

Gözüm doymur ala gözdən，
Meylini döndərmə bizdən，
Aşıq Əsəd，önümüzdən，
Ötür boylana-boylana.