Düşdüm (Mirzə Baxış Nadim)

Düşdüm Müəllif: Mirzə Baxış Nadim

Mənbə: Tərtib edəni: Zaman Əsgərli. "XIX əsr Azərbaycan şeiri antologiyası" (PDF). Milli Kitabxana (az.). "Şərq-Qərb". 2005. 2016-03-05 tarixində arxivləşdirilib (PDF). İstifadə tarixi: 2016-08-13.

Neyləmişdim, yarəb, həqq dərgəhində,
Xəstə olub müdam, cahanə düşdüm.
Yazıldı naməmiz ölkəbəölkə,
Yetişdi dillərə, dastanə düşdüm.

Can qurban eylərəm görsəm dustimə,
Durubdurlar o zalımlar qəsdimə,
Yengi gəlmiş idi təbib üstümə,
Qədəm basdı geri, dərmanə düşdüm.

Canü başım olsun yolunda fəda,
Cavan ömrüm əcəb yanıbdur oda,
Neyləmişdim məgər, ey Tari, xuda,
Giriftar oluban, zindanə düşdüm.

Xəstə Baxış, sözün demə bihesab,
Oxudum Quranda ayətül-kitab,
Təşnəlikdən oldu cigərim kabab,
Axtarıban dəşti-bəyanə düşdüm.