Dəli könül, səndə nələr dolanır

Vikimənbə saytından
Jump to navigation Jump to search
Dəli könül, səndə nələr dolanır
Müəllif: Aşıq Musa
Mənbə: Aşıq Musa, "Əsərləri" (tərtib edəni:İslam Ələsgər), Bakı, "Elm və təhsil", 2013.

 
Dəli könül, səndə nələr dolanır,
Biri qışdı, biri payız, biri yaz.
Üç əlamət gözəllər nişanı,
Biri işvə, biri qəmzə, biri naz.

Coşqun çaylar kimi qaynadım, doldum,
Hayva tək saraldım, gül kimi soldum.
Gedərikən üç gözələ tuş oldum,
Biri qarı, biri gəlin, biri qız.

Qürbət eldə kimdi halım soruşan,
Ağ üzündə qoşa xal verir nişan.
Üç şeydir ki, bu otağa yaraşan,
Biri Musa, biri söhbət, biri saz.