Dəvatımın üzü sadə, içi dərin dəryadır

Dəvatımın üzü sadə, içi dərin dəryadır Müəllif: Xaqani Şirvani Tərcümə edən: Ələkbər Ziyatay

Dəvatımın üzü sadə, içi dərin dəryadır,
Qara suyu nəhəngiylə əcəb ona oxşayır*.

Görübsənmi, necə sökər dan qaranlıq bağrını?
İki mənada dəvatım nurlu dana oxşayır*.

Musa "yədi-beyza"sının timsalıdır bu dəvat,
Qələm dəxi inci səpən bir ilana oxşayır*.

Zireh dələn qələmimin uçu - nizə gəzdirən,
Gözətçilər nəzərində bir peykana oxşayır.

Sözlərimlə şahlar kimi döyüşərkən, dəvatım.
Sultanların sursat, silah anbarına oxşayır.

Xaqaninin təbi tutmuş cilovundan Ceyhunun,
Dəvatısa Səmərqəndi - Xızrxana oxşayır*.