Dəyişər (Aşıq Sədrəddin)

Vikimənbə saytından
Naviqasiyaya keçin Axtarışa keçin
Eyni adda digər əsərlər üçün dəqiqləşdirmə səhifəsinə baxın.
Dəyişər
Müəllif: Aşıq Sədrəddin
Mənbə: Seyfəddin Qəniyev, 1918-ci il Şamaxı soyqırımı şəhidlərindən iki nəfəri - Əngəxaranlı Aşıq Xəlil və Aşıq Sədrəddin, "Ozan dünyası" jurnalı, №3(24), 2015. səh.24-30.

  
Gəl uyma bəzəyə, mala, dövlətə,
Çoxaldıqca xişmi-halın dəyişər.
Var-dövlət artdıqca ar kasadlaşar,
Kobudlaşar, hər əhvalın dəyişər.

Demirəm, ac dolan sən bilə-bilə,
Hərdən yön ver gəl, xeyir əmələ,
Əl tut, kömək elə şilə, əlilə,
Əskik olar, qeyri-qalın dəyişər.

Sərdə qorxun olsun “yazı yazandan”,
Günah etsən, mərhum edər azandan.
Qəfil külək əsər, qəhri-qəzadan,
Varın əldən çıxar, yolun dəyişər.

Sədrəddinəm, mən sözümə ağayam,
Sanmaginən bələkdəyəm, çağayam,
Nəsihət bəhriyəm, sözün sağıyam,
Eşitməsən, nur-kamalın dəyişər.