Gəlmədi (Aşıq Camal)

Eyni adda digər əsərlər üçün dəqiqləşdirmə səhifəsinə baxın.

Gəlmədi Müəllif: Aşıq Camal

Mənbə: Paşa Əfəndiyev (2017). Molla Cümə (həyatı və yaradıcılığı) (az). "Ləman nəşriyyat poliqrafiya". Yoxlanılıb 2018-08-31.

Gecə-gündüz yollarına baxaram,
Hanı mənim barabarım, gəlmədi.
Məni saldı beylə müşkül hallara
Bietibar biilqarım gəlmədi.

Genə dərdim ziyad oldu bu gündən
Yaramın həsrəti heç çıxmaz candan
Nə səbəbdir, yüzün döndərdi məndən?
Bu insafsız biqərarım gəlmədi.

Şahbazın qəmzəsi mənə yağıdır,
Bundan ayrı bal da yesəm, ağudur.
Aşıq Camal, ağlamağın çağıdır,
Cümləsi gəldisə, yarım gəlmədi.