Gəlmədi (Aşıq Mirzə Bilal)

Vikimənbə saytından
Jump to navigation Jump to search
Disambig.svg Eyni adda digər əsərlər üçün dəqiqləşdirmə səhifəsinə baxın.
Gəlmədi
Müəllif: Aşıq Mirzə Bilal
Mənbə: Mirzə Bilal (1872-1937) (az). shahbulaq.az (07.01.2015). Yoxlanılıb 2015-05-02.

  
Yenə bahar gəldi, növbahar oldu,

Niyə mənim şux baharım gəlmədi?

Hərə xürrəm oldu öz yuvasında,

Gözlərim yoldadı,yarım gəlmədi.


Onunla mənalı keçirdi günüm,

Ürəyim açılmır, de necə, gülüm?

Artıb bülənd olub göylərə ünüm,

Cam sirdaşım, xiridarım gəlmədi.


Fərhad Şirin üçün dağları çapdı,

Sənan yar yolunda qalalar yapdı.

Hamı istəyini aradı, tapdı,

Nədən o xoş rüzigarım gəlmədi?


Aşıq Bilal, göz yaşlarım selləndi,

Muncuq kimi gözlərimdə gülləndi.

Bir aj çəkdim, dilsiz daşlar dilləndi,

Xoş günümdə səbəbkarım gəlmədi.