Heyranam bir gülə, heyran ona cənnət bağı
Heyranam bir gülə, heyran ona cənnət bağı Müəllif: Vüqar Biləcəri Tərcümə edən: Hüseyn Cəlilov |
Mənbə: Vüqar Biləcəri. "Qərib xəyal" kitabı. Səh 22. |
Heyranam bir gülə, heyran ona cənnət bağı,
Hurilər də ola bilməz atılan dırnağı.
Pərdeyi-qeybi- yarıb, rəfi-niqab etsə o mah,
Görən heyrətlənər, ağzında qalar barmağı.
Gəl, o qanla bəzənən lalələrin xatirinə,
Yandırır bağrımı, ey lalərux, hicran dağı.
Mürği-dil etdi səfər mənzili-cananə tərəf,
Sinəsin deşdi üqabi-əcəlin caynağı.
Fani dünya kimi dünyadakılar fani imiş,
Nə könül sirdaşı varmış, nə də dərd ortağı.
Dişlərin ləblərin altında düzülmüş səf-səf,
Kim atıb incilərin üstünə gül yarpağı?
Aç, o könlüm quşunu zülfi-girehgirindən,
Əcr alar həbsdən azad eləyən dustağı.