Keçindin aləmi-heyrətdə, ey dil

Keçindin aləmi-heyrətdə, ey dil Müəllif: İsmayıl bəy Nakam

Mənbə: Tərtib edəni: Zaman Əsgərli. "XIX əsr Azərbaycan şeiri antologiyası" (PDF). Milli Kitabxana (az.). "Şərq-Qərb". 2005. 2016-03-05 tarixində arxivləşdirilib (PDF). İstifadə tarixi: 2016-08-13.

Keçindin aləmi-heyrətdə, ey dil,
Keçirdin ömrünü qəflətdə, ey dil!

Görüb bu aləmi-adəmfəribi
Unutdun əhdi bir röyətdə, ey dil!

Fəraqət hasil et, tərki-səva qıl,
Yetər ah etdiyin möhnətdə, ey dil!

İrişdi aşiqan yeksər vüsalə
Həmin sənsən qalan firqətdə, ey dil!

Mücərrəd ol, mücərrəd ol da, gör də,
Nələr var guşeyi-vəhdətdə, ey dil!

Həzəran dərdi-rühazar çəkdin
Yenə töhmətdəsən, töhmətdə, ey dil!

Olub Nakamə dil nakam oldun,
Yaxıldın atəşi-həsrətdə, ey dil!