Mən ki, ləlin can yerində görmüşəm

Mən ki, ləlin can yerində görmüşəm Müəllif: Həbibi

Mənbə: Həbibi (2006). Şeirlər (az). "Şərq-Qərb". Orijinal mənbədən 2017-04-27 tarixində arxivləşdirilib. Yoxlanılıb 2017-05-16.

Mən ki, ləlin can yerində görmüşəm,
Dərdini dərman yerində görmüşəm.

Tiri-qəmzən zəxmini candan rəvan
Mərdüm axar qan yerində görmüşəm.

Xaneyi-gözdə xəyalın kölgəsin,
Şükr kim, mehman yerində görmüşəm.

Gün yüzündə küfri-zülfin, ey sənəm,
Mən yəqin iman yerində görmüşəm.

Müshəfi-hüsnündə xəttü xalını
Hərfbəhərf Quran yerində görmüşəm.

Qaşların yayinə kim eyd ayıdır,
Canları qurban yerində görmüşəm.

Hər nə cövr etsən, Həbibi, lütf ilə,
Hüsni-xülq ehsan yerində görmüşəm.