Məndən (Aşıq Musa)

Vikimənbə saytından
Jump to navigation Jump to search
Disambig.svg Eyni adda digər əsərlər üçün dəqiqləşdirmə səhifəsinə baxın.
Məndən
Müəllif: Aşıq Musa
Mənbə: Aşıq Musa, "Əsərləri" (tərtib edəni:İslam Ələsgər), Bakı, "Elm və təhsil", 2013.

 
Gecə-gündüz ahu kimi mələrəm,
Yetişirmi sənə nalalar məndən?!
Fərhad olub, dağı-daşı dələrəm,
Hürküşür göllərdə sonalar məndən.

Mən nə desəm, sən incimə dilimdən,
Sübhə kimi aləm yatmaz ünümdən.
Bir öpəydim yanağının gülündən,
Usanıb qönçələr, lalalar məndən.

Musa deyir, bu sözümdən küsmə sən,
Təbib olub, qədəmlərin basmasan .
Öz əlinlə yaralarım açmasan,
Öldürər, qurtarmaz yaralar məndən.