Ol zaman kim məst qıldı çeşmi məxmurun məni
| Ol zaman kim məst qıldı çeşmi məxmurun məni Müəllif: Həbibi |
| Mənbə: Həbibi (2006). Şeirlər (az). "Şərq-Qərb". Orijinal mənbədən 2017-04-27 tarixində arxivləşdirilib. Yoxlanılıb 2017-04-27. |
Ol zaman kim məst qıldı çeşmi məxmurun məni![1]
Xaki-pakə ol dəm etdim, mən fəda canü təni.
Əqlimü fikrim dağıldı, bir yerə cəm olmadı,
Bu pərişan könlümün olalı zülfin məskəni.
Bu cəhanü can dimağın tazəvü xoşbu edər,
Dəprədə badi-səba çünkim şu zülfi-müşkini.
Ey şahənşahi-cəhan, vey padşahi-insü can,
Gör bu bipa, sər-fütadə qandə qalmış məskəni.
Sən məni bir dəmdə min gəz öldürürsən cövr ilə,
Bir nəfəs mən şükrü həmddən qeyri anmazam səni.
Yığmagil ğəm ləşgəriylə, billah, ey sultani-can,
Görəli can Kəbəsində çün o vəchi-əhsəni.
Bu Həbibi surəti-rəhmanə edər səcdəsin,
Bu viran dil kim olubdur, gənci-eşqin məxzəni.
Qeydlər[redaktə]
- ↑ Bu qəzəl vəzn və qafiyə etibarilə nöqsanlıdır.