Qıjhaqıj

Vikimənbə saytından
Jump to navigation Jump to search
Qıjhaqıj
Müəllif: Aşıq Ələsgər
Mənbə: Niftalı Göyçəli (2017). "Göyçə ustadları" (antologiya), I hissə. (az). Bakı: "Elm və təhsil". ISBN 978-9952-8176-1-2. 2017-11-23 tarixində arxivləşdirilib. 2017-11-23 tarixində istifadə olunub.

Hər kəsin qəsdindən aşıqlıq keçir,
Qarşı gəlsin edək cəngi qıjhaqıj.
Dəli eşq də* dərya təki çalxanır,
Qeyzə gəlir səs ahəngi qıjhaqıj.

Hər kəs istər qana aşıq sirrini,
Axtarsın dayazı, gəzsin dərini.
Qeyli-qala salan aşiq sərini,
Siyah çalar qızıl rəngi qıjhaqıj.

Ələsgərin qəddi Sinaya yetər,
Dərs alanlar gedər sinaya yetər.
Əzrail qəsd eylər, sinaya yetər,
Can alar dəstində cəngi qıjhaqıj.