Qarabağ torpağı

Qarabağ torpağı (28.07.2021) Müəllif: [[Müəllif:Teymur Kərimli|Teymur Kərimli]]

Qarabağ torpağı, söylə, qara bağın necədir?

Qara torpaqda bitən barlı budağın necədir?

Düşmənin çəkdiyi çarpaz dağa məlhəm qoyulur,

Ucalan göylərə məğrur qoca dağın necədir?

Şəhidin qanı olubdur yağının üz qarası,

Görürəm, alnın açıq, üzdəki ağın necədir?

Ağlayıbdır neçə illər sinən üstə gecələr,

Daha gülsün əbədi – güllü bulağın necədir?

Şuşanın çal-çağırı çünki qonaq təşnəsidir,

Gözün üstə yer alan ali qonağın necədir?

Dağa söykəndin, əsil dağ polad övladın imiş,

Uca dağlar kimi qeyrətli dayağın necədir?

Yağını yaslı görüb, Teymur, utanma, xəbər al:

“Qulağında açılan cüt şapalağın necədir?”