Qartal (Aşıq Şenlik)

Vikimənbə saytından
Jump to navigation Jump to search
Disambig.svg Eyni adda digər əsərlər üçün dəqiqləşdirmə səhifəsinə baxın.
Qartal
Müəllif: Aşıq Şenlik
Mənbə: Qəşəm Vəliyev (2012). Çıldırlı Aşıq Şenlik (az). Azərnəşr. achiqkitab.az. Yoxlanılıb 2017-02-14.

Nə baxırsan məlul-məlul üzümə,
Qoydun ürəyimə vərəmi, qartal.
Qanad çaldın, pərvaz etdin uçmağa,
Zalım güllə kəsdi aranı, qartal.

Zəhmin ağır, pəncən aslan pəncəsi,
Qorxundu quşların zor işgəncəsi,
Ovçusan, ovçunun olmaz gecəsi...
Gör saldın yadıma haranı, qartal?

Sarıdı gözlərin, məğrurdu başın,
Caynaqlıdır pəncən, kəskindir dişin,
İnsafsız, zülmkar zabit yoldaşın,
Öldürməkdi səni məramı, qartal.

Səfil Şenlik zülm eylədi sənə,
Çalardın, çapardın, batardın qana,
Dərdin həddən aşıb, ta gəlməz sana,
Loğman da sağaltmaz yaranı, qartal.

%75 tamamlandı