Qatarından ayrı düşmüş dəli bir həvalı durna

Qatarından ayrı düşmüş dəli bir həvalı durna Müəllif: Vüqar Biləcəri Tərcümə edən: Hüseyn Cəlilov

Mənbə: Vüqar Biləcəri. "Qərib xəyal" kitabı. Səh 76

Qatarından ayrı düşmüş dəli bir həvalı durna,
Nə qərib-qərib baxırsan, ürəyi yaralı durna.

Yenə gəldi mahi-matəm, yenə başladı Muhərrəm,
Geyinib əza libasın yenə Kərbəlalı durna.

İki körpəcik balan var, vətənin, yerin, yuvan var,
Səni gözləyənlərin var, qayıt, ey vəfalı durna.

Duruşun bir ayrı dünya, baxışın bir ayrı dünya,
Necə yarə bənzəyirsən, necə, ey həyalı durna.

Sənə Kəbədən gələnlər təvaf eyləyən görüblər,
Qədəmin mübarək olsun, əzəmətli, ali durna.

Elə şövq ilə gedirsən, bilinir məhəbbətin var,
Sənə göstərər nigarın o günəş camalı, durna.