Qiyamət yaxın gələndə

Qiyamət yaxın gələndə Müəllif: Zinhari

Mənbə: Anar. Min beş yüz ilin oğuz şeri. Antologiya, I kitab (az.). Bakı: "Azərbaycan". 1999. 2017-07-08 tarixində arxivləşdirilib (PDF). İstifadə tarixi: 2017-07-08.

Neçə əlamətlər olar,
Qiyamət yaxın gələndə.
Bəd işlər cahana dolar,
Qiyamət yaxın gələndə.

Ədalətin pozar xanlar,
Bağlanar xeyrat-ehsanlar,
Çox tökülər nahaq qanlar,
Qiyamət yaxın gələndə.

Ötər neçə ərlər, mərdlər,
İlbəildən artar dərdlər.
Çoxalar and ilə şərtlər,
Qiyamət yaxın gələndə.

El qururlar haram yerə,
Hər bir çökü bənzər pirə.
Səfaillər dönər şirə,
Qiyamət yaxın gələndə.

Zinhari, baxmazlar imana,
Rəvac verlibmi yamana?
Əməl etməzler Qurana,
Qiyamət yaxın gələndə.