Qurban

Vikimənbə saytından
Jump to navigation Jump to search
Qurban
Müəllif: Şair Məmmədhüseyn
Mənbə: Şair Məmmədhüseyn (2018). Nur çeşməsi (az). Elm və təhsil. Yoxlanılıb 2018-09-20.

Xumar gözə vermə cəfa,
Axan göz yaşına qurban.
Ürəyimi salma xofa,
Yar, qələm qaşına qurban.

Dodağını büzmə belə,
Əlin məndən üzmə belə.
Dövran sürək, deyə-gülə,
Ceyran duruşuna qurban.

Məmmədhüseynin tacidarı,
Malı, mülkü, dövlət-varı.
İncə qədəm verib tarı,
Yeri, yerişinə qurban.