Sənsən (Aşıq Musa)

Vikimənbə saytından
Jump to navigation Jump to search
Disambig.svg Eyni adda digər əsərlər üçün dəqiqləşdirmə səhifəsinə baxın.
Sənsən
Müəllif: Aşıq Musa
Mənbə: Aşıq Musa, "Əsərləri" (tərtib edəni:İslam Ələsgər), Bakı, "Elm və təhsil", 2013.

 
A bimürvət, soruşmadın halımı,
Artıran möhnəti, məlalı sənsən.
O süzgün baxışın alır canımı,
Sərəfraz dağların maralı sənsən.

Mail oldum ağ sinənin ağına,
Girəydim qoynuna – Cənnət bağına.
Əl ataydım Şamamanın tağına,
Dağıdan fikrimi xəyalı sənsən.

Musa deyər, mənəm bəxti qaralı,
Dərmandı xəstəyə ləblərin balı.
Səni sevən neylər dövləti, malı,
Malı, mülkü cahü cəlalı sənsən.