Savalan dağının tərifi

Vikimənbə saytından
Naviqasiyaya keçin Axtarışa keçin
Savalan dağının tərifi
Müəllif: Xaqani Şirvani

Səadət qibləsi Savalan dağı,
Şərəfdə Kəbətək qazanıb şöhrət.

Kəbə yaşıl geyər, ağ bürünər o,
Çünki, ehram tutan geyər ağ xələt.

Bir yerdə oxudum fəzilətindən,
Üç ildir çəkirəm görməyə həsrət.

Getdim ki, başına dolanım onun,
Dağlar anasıdır çünki o afət.

Başdan ayağadək örtükdədir o,
Deyir: - Bakirəyəm, - açınca söhbət.

Min illər ömr edən bu qoca qarı,
Desə: - Bakirəyəm, - yalandır əlbət.

Gəldi daxmasına Xızr ilə Musa,
Yoxsul daxmasıyçın çəkdi xəcalət.

Qarının yekədir burnu, bu örtük,
O eybi örtməyə eləyir xidmət.

Dedim ki, çadranı üzündən götür,
Kim dedi qız kimi üzünü gizlət?

Dedi ki, dörd aydan sonra bir külək,
Qapanda çadramı, görünər surət.

Xaqani, gəl, onda bakir sözünlə,
Başına çadra sal, anandır, gizlət!

Mənbə[redaktə]