Vaxtı (Ağdabanlı Qurban)

Vaxtı Müəllif: Ağdabanlı Qurban

Mənbə: Azərbaycan Aşıqlar Birliyi (2020). Ustad nəfəsli saz-söz ərməğanı (az). “Zərdabi Nəşr” MMC nəşriyyatı. Orijinal mənbədən 17 iyun 2023 tarixində arxivləşdirilib. Yoxlanılıb 17 iyun 2023.

 
Bir canda ki, ola sümük azarı,
Oynar, durmaz dəf olan vaxtı.
Yaxşı-yaman bilməz, danışar hədyan,
Əqli sərsər olar, kef olan vaxtı.

Bağban bar bəsləsə barı çox istər,
Xəstə meyli qarı, narı çox istər,
Acgöz doymaz, dövlət-varı çox istər,
Şadlanar dövlətə, nəf olan vaxtı.

Qurban, insan varmı dərdsiz, vərəmsiz,
Mətləb yazmaq olmaz kağız, qələmsiz,
Qul xətasız olmaz, ağa kərəmsiz,
Bağışlar əlbəttə səhv olan vaxtı.