Vaxtıdı

Vikimənbə saytından
Jump to navigation Jump to search
Vaxtıdı
Müəllif: Aşıq Abbas Tufarqanlı
Mənbə: Azərbaycan ədəbiyyatı inciləri. Bakı, 1988. Səh.74-75.


Budu gəldi bahar fəsli,
Dağların lala vaxtıdı.
Açılıbdı qızıl güllər,
Bülbülün bala vaxtıdı.

Bülbüllər dolandı bağı,
Bir xəlvət eylə otağı.
Sənə qurban olum saqi,
Mey ver, piyalə vaxtıdı.

Mən Abbasam, boyu bəstə,
Dərdindən olmuşam xəstə.
Al başımı dizin üstə,
Çal yataq, layla vaxtıdı.