Yaralananda

Yaralananda Müəllif: Şair Məmmədhüseyn

Mənbə: Şair Məmmədhüseyn. "Nur çeşməsi" (PDF) (az.). Elm və təhsil. 2018. İstifadə tarixi: 2018-09-20.

Necə tab gətirsin belə ağrıya,
Könlü sınan aşiq, yaralananda.
Əl çirki sayılan vara, dövlətə,
Əzəlindən nazlı yar allananda.

Bağlıyam ilk gündən düzgün ilqara,
Batsam zimistana ay, gün, il qara.
Edibsən günümü bütün il qara,
Uğursuz nazənin, yar aralan, da.

Məmmədhüseyni azmı çəkdin sən anda,
Çəkməz bu xiffəti Məcnun, Sənan da.
Bir dəfə də gəl adımı sən an, da,
Sevinim sən təki yarar alanda.