Yasdı dağlar

Eyni adda digər əsərlər üçün dəqiqləşdirmə səhifəsinə baxın.

Yasdı dağlar Müəllif: Aşıq Bəsti

Mənbə: Aşıq Bəsti (2013). Bənövşələr (az). Gəncə. Orijinal mənbədən 2018-09-14 tarixində arxivləşdirilib. Yoxlanılıb 2018-09-14.

Ay dağlar, yasdı dağlar,
Qar, duman basdı dağlar.
Yarı yardan ayırmaq,
Səndə həvəsdi, dağlar.

Ay dağlar, yasdı dağlar,
Ot səni basdı, dağlar.
Gəl bir də qan eyləmə,
Qan etdin bəsdi, dağlar.

Ay dağlar, yasdı dağlar,
Acı yel əsdi, dağlar.
Səndə üzü gülmədi,
Ağladı Bəsti, dağlar.