Yaz havası

Yaz havası Müəllif: Aşıq Heydər

Mənbə: Qəşəm Vəliyev. "Çıldırlı Aşıq Şenlik" (PDF). Azərnəşr (az.). achiqkitab.az. 2012. İstifadə tarixi: 2017-02-14.

Mələşir qoyun-quzular,
Gələn yazın havasından.
Bilinir ki, “Dübeyti”dir,
Telli sazın avazından.

Dayçalar oynar, qapışar,
İnsan torpaqla tapışar,
Cütün məcindən yapışar,
Cütçü çıxıb yuvasından.

Dəlilənən sellər-sular,
Bulanıq axar, durular,
Heydər ellərdən sorular.
Ağbabadan, obasından.