Yoxdu, yox

Vikimənbə saytından
Jump to navigation Jump to search
Yoxdu, yox
Müəllif: Ağdabanlı Qurban
Mənbə: Seçmə aşıq şeirləri. 3 cilddə. I cild (az). DGTYB (2011). Orijinal mənbədən 2016-04-01 tarixində arxivləşdirilib. Yoxlanılıb 2016-08-11.

Ağa, şikayətim var qulluğuna,
Zərrəcə sözümdə yalan yoxdu, yox.
Göstərdim cərraha, təbib-loğmana,
Dedilər: bu dərdə dərman yoxdu, yox.

Yardan ayrı dözə bilməm, neyliyim,
Alışır dəhanda, odlanır dilim.
Bu dərdin dərmanı ölümdür, ölüm,
Sağlığıma daha güman yoxdu, yox.

Kərəm qılıb mətləbləri bitirən,
Həsrətləri bir-birinə yetirən;
Ay Qurbanı qulluğuna gətirən,
Görərsən ki, bir də Qurban yoxdu, yox.