İstər (Növrəs İman)

Vikimənbə saytından
İstər
Müəllif: Növrəs İman
Mənbə: Növrəs İman (az). "Ozan dünyası" jurnalı (2010). Orijinal mənbədən 2016-08-11 tarixində arxivləşdirilib. Yoxlanılıb 2016-08-11.

Zimistan fəslində qəm alan canım,
Dolanıb gəlməyə yeni yaz istər.
Ürəkdə mətləbin kəm alan canım,
Etməyə könlünü sərəfraz istər.

Səfərim xatalı, gülşənim barsız,
İşləmir mətahım, olub bazarsız.
Gövhəri-sərrafım dolanır karsız,
Açmağa balü pər bir şahbaz istər.

Gah zaman oluram pərişanxəyal,
Üruc edir ruhum bir laçın misal.
Çıxa bir kənara, götürə cəngal,
Gətirə əldə bir sərvinaz istər.

Nəfsiz ticarətçi olsa, qəm çəkər,
Arsız bu dünyanın dərdin kəm çəkər.
İman cümlə qayğı, sübhü şəm çəkər,
Kim versə cavabım, tezcə yaz istər.