Analar bəzəyi (Gər olsa nisadə elmü irfan)

Vikimənbə saytından
Eyni adda digər əsərlər üçün dəqiqləşdirmə səhifəsinə baxın.
Analar bəzəyi
Müəllif: Mirzə Ələkbər Sabir

Gər olsa nisadə elmü irfan
Övladə edər bu yolda iman.

Əksi olaraq bu müddəanın,
Olmaz isə elmi bir ananın –

Övladə çatar haman cəhalət,
Nə əql olur onda, nə fərasət;

Bitərbiyəliklə tifli-məsum
Axırda olur səfilü məşum;

Saridir çünki işbu halət, –
Həmcinsinə eyləyər sirayət.

Gözlənsə gərək hüquqi-nisvan,
Ta kamil ola vüsuqi-nisvan.

Elm ilə olur hüsuli-izzət,
Elm ilə olur nüfuzi-millət.

Elmə çağırır bütün əvamı
“Əl-elmü fərizətün” kəlamı.

Mənbə[redaktə]

  • Mirzə Ələkbər Sabir, Hophopnamə. Bakı, "Turan" nəşrlər evi, 2002. səh. 298