Ayı və şir (Abbas Səhhət)

Eyni adda digər əsərlər üçün dəqiqləşdirmə səhifəsinə baxın.

Ayı və şir Müəllif: Abbas Səhhət

Əlbir olub bir ayı bir şir ilə,
Ovladılar dovşanı tədbir ilə.

Olmadılar razı onu bölməyə,
Çıxdı iş axır ölüb-öldürməyə;

Çeynədilər, dişlədilər, diddilər,
Bir-birini al qana qərq etdilər.

Özlərini taqətdən saldılar,
Hər biri bir səmtə düşüb qaldılar.

Tülkü uzaqdan görüb bu haləti,
Bildi ki, yox heç birinin taqəti.

Gəldi götürdü ovu, etdi fərar,
Həsrət ilə baxdı dalınca onlar.