Beşi nə

Vikimənbə saytından
Jump to navigation Jump to search
Beşi nə
Müəllif: Tikmədaşlı Xəstə Qasım
Mənbə: Sədnik Paşa Pirsultanlı (2011). Tikmədaşlı Xəstə Qasımın ədəbi irsinin tədqiqi (az). Azərnəşr. Yoxlanılıb 2018-08-06.

Beş yaşımdan on beş yaşa yetişdim,
Beşin atdım, beşin tutdum, beşi nə?
Haqq tərəfdən doğru yola yetişdim,
Bəlli oldum mən biyabar beşi nə?

Ömür bənzər dağ başında dumana,
Qəflətcə mən də yetdim ümmana,
On beş şey vacib oldu islama,
Beşi Sulidin, beşi Firudin, beşi nə?

Xəstə Qasım qaldı həyat içində,
Din bir, xuriman şərait içində,
On beş şey də gəldi səlat içində,
Beşi oruc, beşi namaz, beşi nə?