Görünür (Növrəs İman)

Vikimənbə saytından
Jump to navigation Jump to search
Disambig.svg Eyni adda digər əsərlər üçün dəqiqləşdirmə səhifəsinə baxın.
Görünür
Müəllif: Növrəs İman

Həyat bir dövrandı, iki üzlüdü,
Qarası görünür, ağı görünür.
Hər sözün, söhbətin öz məqamı var,
Çürüyü görünür, sağı görünür.

Bir barlı baqçaydım, barım kəsildi,
Vaxtsız xəzan əsdi, karım kəsildi.
Vətənimdən e'tibarım kəsildi,
Qürbət ellər mənə yağı görünür.

Növrəs İman haqdan istər payını,
Dərdə düşsün muxənnəti, xayını.
Yemə çörəyini, içmə çayını,
Namərd sufrəsində ağı görünür.