Hey

Vikimənbə saytından
Jump to navigation Jump to search
Hey
Müəllif: Növrəs İman
Mənbə: Növrəs İman (az). "Ozan dünyası" jurnalı (2010). Orijinal mənbədən 2016-08-11 tarixində arxivləşdirilib. Yoxlanılıb 2016-08-11.

Hicran yürüş etdi, qəm aldı canım,
Ağlar gözüm, qanlı yaşlar tökər hey.
Dərdü-möhnət bürüyübdü hər yanım,
Qoşub dildə qəm kotanı əkər hey.

Kim mənim tək tənə sözlər götürdü?
Zəhmət çəkib, çox cəfasın itirdi?
Dərd artdı sinəmdə, həddin ötürdü,
Hesabınan dağı-daşı çəkər hey.

Əzəl gündən mehman oldum yad elə,
Dərdim Qafa döndü, göz yaşım selə.
Novrəs İman, işin düşdü müşkülə,
Cavan qəddin yar fəraqı bükər hey.