Qaldı (Növrəs İman)

Vikimənbə saytından
Qaldı
Müəllif: Növrəs İman
Mənbə: Növrəs İman (az). "Ozan dünyası" jurnalı (2010). Orijinal mənbədən 2016-08-11 tarixində arxivləşdirilib. Yoxlanılıb 2016-08-11.

Qərib bağban idim, çox çəkdim cəfa,
Dərilməmiş güli-bostanım qaldı.
Gəlmədi bimürvət fələk insafa,
Dərdli, qəmli günüm, dövranım qaldı.

Qəza rəfiq oldu, mənilən gəzdi,
Ümidim, əlacım hər yandan üzdü.
Fələk öz əliynən rövnəqim pozdu,
Qəm mətalı dolu meydanım qaldı.

Bəxti kəm olmuşam mən əvvəl başdan,
Can qəmdən ayrılmaz, didəm qan-yaşdan.
Qurtarmadım bircə oddan, ataşdan,
Xəstəyəm, dərd üçün dərmanım qaldı.