Vikimənbə:Günün mətni/İyun 12
Kişilər
Əli Nəzmi
Biz almışıq arvad, alaq çəkməyə,
Almamışıq zülfə daraq çəkməyə.
Biz almışıq: arvad ola cariyə,
Almamışıq: xanım olub yariyə.
Biz almışıq övrəti iş görməyə,
Almamışıq, gündə saçın hörməyə.
Biz almışıq qayınana saxlasın,
Almamışıq, gecə-gündüz yuxlasın.
Biz almışıq övrəti əppək yapa,
Almamışıq, düzməyə mıncıq sapa.
Biz almışıq saqqala rəng yaxmağa,
Almamışıq, qızıl, şəvə taxmağa.
Biz almışıq övrəti ev saxlaya,
Almamışıq, hey gəzə sarsaqlaya.