Vikimənbə:Günün mətni/yanvar 29
And olsun
Mikayıl Müşfiq
Şairləri qanadında bəsləyən
İnsanların həyatını süsləyən
İncə ruhlu mələklərə and olsun!
Boynundakı dalğa-dalğa tellərə,
Qaşlarının altındakı sellərə,
Qəlbindəki istəklərə and olsun!
Gül üzündə yeni-yeni açılmış,
Xoş iyisi ürəyimə saçılmış
Qoxladığım çiçəklərə and olsun!
Qumruların yatağını oxşayan,
Pişik kimi ayağını oxşayan
Salxım-salxım küləklərə and olsun!